Sep 17, 2010

വേദനിക്കുന്ന അരിവയ്പ്പുകാരന്‍

ഡേയ്..ഒന്ന് വേഗം.. വിശന്നിട്ടു കണ്ണ് കാണാന്‍ മേല..
വടേം ചായേം കിട്ടാന്‍ താമസിച്ചതിന്റെയാ........വിരമിച്ച സൂപ്പര്‍ താരമാന്നു പറഞ്ഞിട്ടെന്താ..ഇപ്പോഴും വിചാരം മലയാള സിനിമ ഇങ്ങോരുടെ ചുറ്റും കറങ്ങുവാ എന്നാ വിചാരം..ഒരു കാലമുണ്ടായിരുന്നു..സൂപ്പര്‍ താരം സതീഷ്‌ കുമാറിന്..എന്തായിരുന്നു ജാഡ...ഇപ്പൊ വല്ലപ്പോഴും ഒരു പടം ഹിറ്റായാ ഭാഗ്യം..എന്നാലും കുറ്റം പറയരുതല്ലോ...അഹങ്കാരത്തിന് കുറവൊന്നും ഇല്ല കേട്ടോ..വരുന്ന മകരത്തില്‍ വയസു അറുപത്തി രണ്ടു..ഇപ്പോഴും കോളേജ് കുമാരനായിട്ടെ അങ്ങൊരു അഭിനയിക്കു...വീപ്പകുറ്റി പോലാ വയറെന്നു ഫാന്‍സുകാര് തന്നെ അടക്കം പറയുന്നുണ്ട്...ഓള്‍ കേരള സതീഷ്കുമാര്‍ ഫാന്‍സ്‌ ആന്‍ഡ്‌ വെല്‍ഫയെര്‍ കാരുടെ ഒരു പ്രസിടന്റുണ്ടല്ലോ..ആനച്ചാല്‍ സാബു..ആ ദ്രോഹി ഇന്നലെ പതിനായിരം എണ്ണി വാങ്ങിക്കൊണ്ടു പോയപ്പം കൂട്ടത്തില്‍ ഉള്ള വാര്‍ക്കപ്പനിക്കാര് പിള്ളേരോട്അങ്ങനെ പറയുന്നത് കേട്ടപോ സത്യം പറഞ്ഞാല്‍ ഈ മനുഷ്യനോടു പാവം തോന്നി...പിന്നെ അവരേം പറഞ്ഞിട്ട് കാര്യമില്ല...പണി ഇല്ലാതെ നടക്കുമ്പം ഇങ്ങോരുടെ കയ്യീന്ന് വല്ല നക്കാ പിച്ചേം കിട്ടിയാ അന്നന്നത്തെ കെമിക്കല്‍ അടിനടക്കും!ഇനി മത്സരം ആറാം സ്ഥാനത്തിനു വേണ്ടി മാത്രം എന്ന് ഫാന്‍സുകാര്‍ പോസ്റര്‍ ഒട്ടിച്ചതിനു മുതലാളി ഇന്നാള് ശരിക്ക് കൊടുത്തു.....നേരല്ലേ...ഇരുപതും മുപ്പതും വയസില്‍ താഴെ ഉള്ളവ പയ്യന്മാരല്ലേ ഇപ്പൊ ആദ്യത്തെ നാലു സൂപ്പര്‍ താരങ്ങള്‍..ഇങ്ങോര്‍ക്ക് അഞ്ചാം സ്ഥാനം തന്നെ ഉണ്ടോ അതിനിപ്പോ..


ആറു പടം പൊട്ടി നിക്കുമ്പോഴാ ഏഴാമത്തെ കഷ്ടിച്ച് രക്ഷപെട്ടത്....അതുകൊണ്ട് എന്നും കുറെ പേര് കഥ പറയാന്‍ എന്നും പറഞ്ഞു കേറി വരും...ചുമ്മാ...രാമായണോം, ഭാഗവതോം ബൈബിളും ഒക്കെ അടിച്ചു മാറ്റി...അല്ലേല്‍ പിന്നെ ഇങ്ങോരുടെ തന്നെ ആയ കാലത്ത് ഇറങ്ങിയ പടത്തിന്റെ ആറാം ഭാഗം എന്നൊക്കെ പറഞ്ഞു...പിന്നെ ഇന്നുവരുന്നത്‌ ഇരട്ട തിരക്കഥക്കാരാണ്.....എന്ത് അപകടമാണോ ഇനി സംഭവിക്കാന്‍ പോകുന്നെ..


ഇന്നാ...ചായേം വടേം ക്യാറ്റ്...(ആത്മഗതമാ കേട്ടാ )അങ്ങനെ എങ്ങാനും പറഞ്ഞാല്‍ പിന്നെ പണി പാപ്പനംകൊട്ടാ!വണ്ടി ഓട്ടിച്ചുനടന്നിരുന്ന ഒരു പാവം ആലുവക്കാരന്‍ ഉണ്ടാരുന്നു...ഇങ്ങനെ ഏതാണ്ട് തമാശിച്ചതിനാ അവന്റെ പണി പോയെ..അതും ഇപ്പൊ ആ പണീം നമ്മുടെ പിടലിക്ക്..
" നിന്റെ സ്പെഷ്യല്‍ മട്ടന്‍ ബിരിയാണി ഇന്ന് ഉണ്ടാവുമോ" ?ഓ എവനും എത്തിയോ കഥകള് കേള്‍ക്കാന്‍ ? പുതിയ ഹാസ്യ താരംബൈജു പള്ളിപ്പുറം ആണ്. സൂപ്പര്‍ താരം സതീഷ്കുമാറിനെ കൊച്ചി ഭാഷ പഠിപ്പിച്ചു എന്ന കുറ്റത്തിന് കേരളത്തിലെ ജനങ്ങള്‍ ഇവനെ അങ്ങ് ഏറ്റെടുത്തു..ഒരോരുത്തന്റെ സമയം..ആദ്യം കണ്ടപ്പോള്‍ സാറേ എന്നാരുന്നു വിളിചോണ്ടിരുന്നെ..ഇപ്പൊ പിന്നെ എടാ, നീ എന്നൊക്കെ ആയി...ഇനി നാളെ എന്താവുമോ എന്തോ..അല്ലേലും പോതുജനത്തിനല്ലേ സുന്ദരന്‍ നെടുമങ്ങാട്‌ വലിയ പ്രോട്യുസര്‍..അരിവെപ്പ പണി എന്ന് സൂപ്പര്‍ താരം നാഴികക്ക് നാല്‍പതു വട്ടം ഓര്‍പിക്കുന്നത് കാരണം രക്ഷപെട്ടു..അല്ലേല്‍ ചിലപോ നമ്മക്കും തോന്നിപോയേനെ...എന്റെ മുടിപ്പുര അമ്മച്ചിയെ..അങ്ങൊരു പറഞ്ഞുപറഞ്ഞു പിന്നെ എല്ലാര്ക്കും എന്റെ കഥ അറിയാം.. "അന്ന് രാത്രി ഞാന്‍ ആലുവയില്‍ നിന്നും ഏറനാകുളത്തിന് വരുന്ന വഴി..കലൂര്‍ പള്ളിയുടെ അടുത്ത് വന്നപോ ഭയങ്കര വിശപ്പ്‌..വിശപ്പെന്ന് പറഞ്ഞ കണ്ണ് കാണാന്‍ മേലാത്ത വിശപ്പ്‌ (അത് എപ്പോഴും അങ്ങനെ ആണല്ലോ ) നോക്കിയപ്പോ സീക്കോ ഹോട്ടല്‍ തുറന്നിരിക്കുന്നു...രണ്ടു പ്ലേറ്റ് മട്ടന്‍ ബിരിയാണി തട്ടി..ഹോട്ടല്‍ മുതലാളി ഒരു പാവം ഫാന്‍ ആയിരുന്നു ..എന്ത് ചെയ്താ കാശു വാങ്ങിക്കത്തില്ല..അപ്പാവി കുഞ്ഞന് ഒരു ഫോട്ടോ എടുത്ത മതീന്ന്..ആരാ ബിരിയാണി വെച്ചേ എന്ന് ചോദിച്ചപ്പോ ദേ ഒരുത്തന്‍ മുന്നിലേക്ക്‌ വരുന്നു...അന്ന് കൂടെ കൂടിയതാ.. ഇങ്ങനെ ഒന്നുമല്ല അപ്പൊ രൂപം..ഇപ്പൊ എന്റെ ചോറ് തിന്നു മെഴുത്തില്ലേ...അങ്ങനെ എന്റെ ചരിത്രം മുഴുവന്‍ കണ്ടവനോടൊക്കെ വിളമ്പും....കുറ്റം പറയരുതല്ലോ...സിനിമ വരികക്കാരും ടീവീക്കാരും ഒക്കെ ഇതൊക്കെ കേട്ടാലും എഴുതുമ്പോഴും പറയുമ്പോഴും സൂപ്പര്‍ പ്രോടുസര്‍ എന്നെ പറയു...പൊതുജനത്തിന് അറിയില്ലാലോ പണി അരിവെപ്പാ എന്നും കാശു മുടക്കുന്നത് മുഴുവന്‍ മുതലാളി ആണെന്നും....


ഇരട്ടകള്‍ ബാബു ബിജു കഥ തുടനുന്നതിനുള്ള പുറപ്പാടാണ്...ദോഷം പറയരുതല്ലോ..മുതലാളി അരി വെപ്പുകാരനെ എപ്പോഴും വിളിച്ചു അടുത്ത് നിര്‍ത്തും...വല്ല പാരയും കഥക്കാത്ത് ഉണ്ടേല്‍ പറയണമല്ലോ..പിന്നെ ചിലപ്പോ അങ്ങോര്‍ക്ക് വട്ടിളവും..അരിവെപ്പുകാരന്‍ ആ പണി ചെയ്ത മതി എന്നൊക്കെ പറയും..എന്നാലും സ്നേഹം ഉള്ളവനാ ..നിന്റെ പേരില്‍ പടം എടുപ്പ് തുണ്ടാങ്ങിയെ പിന്നെ രക്ഷപെട്ടു എന്നൊക്കെ രണ്ടെണ്ണം വീശി കഴിഞ്ഞാല്‍ പറയും കേട്ടാ...

ബിജു പറഞ്ഞു തുടങ്ങി ..കഥയുടെ പേര് രണ്ടു വിഡ്ഢികള്‍ ..ആത്മ കഥ ആണോ എന്ന് ചോദിച്ചാലോ..അല്ലെ വേണ്ട..പണി കിട്ടും !വണ്ണ്‍ ലൈന്‍ പറയാം...ബാബു പറഞ്ഞു..ഒരു എഞ്ചിനീയറിംഗ് കോളേജ് ..അവിടെ പഠിക്കുന്ന രണ്ടു കൂട്ടുകാര്‍..ഒരാള്‍ അരുണ്‍..കൂട്ടുകാരന്‍ വരുണ്‍..ഇരട്ടകളാണോ..മുതലാളിക് ആവേശം കേറി എന്ന് തോന്നുന്നു..കോളജ് എന്ന് കേട്ടാല്‍ ഇങ്ങോര്‍ക്ക് പ്രാന്താ..റിട്ടയര്‍ ആയ പ്രൊഫസറുടെ വേഷം ആണ് മുതലാളിക്ക് കൂടുതല്‍ ചേരുന്നെ എന്ന് അറിയാത്തവന്മാരാണോ ഈ പൊട്ടന്മാര്‍ ?ഇനി ആരെയേലും ചാക്കിട്ടു പിടിച്ചു വല്ല സംവിധാനവും തുടങ്ങനാണോ പരിപാടി?ഇരട്ടകളല്ല സതീശേട്ട..ഒരാളെ ഹിന്ദുവും ഒരാളെ ക്രിസ്ത്യാനിയും ആക്കാം (അല്ലെ തന്നെ ഇപ്പൊ പേര് കേട്ടാല്‍ ഏതാ ഇനം എന്നറിയുന്നെ ) സതീശേട്ടന്‍ ഇതില്‍ പ്രിന്‍സിപ്പല്‍ ആണ്..ഓ..അപ്പൊ ഞാന്‍ സ്ടുടന്റ്റ് അല്ല അല്ലെ..(മഴുവന്‍ ..അറുപത്തി രണ്ടു വയസയവന്‍ പഠിക്കാന്‍ പോകുമോ..വല്ല രാമനാമോം ചൊല്ലി വീട്ടില്‍ ഇരിക്കുവല്ലേ ഉള്ളു )സതീശേട്ടന്‍അതായതു പ്രിന്‍സി ഭയങ്കര അച്ചടക്കക്കാരന്‍ ആണ്...രണ്ടു സുന്ദരികളായ പെണ്മക്കള്‍ ..അരുണും വരുനും കോളേജിലെ കുഴപ്പക്കാരന്.. പക്ഷെ അരുണ്‍ ഭയകര പഠിപ്പിസ്റ്റ് ആണ്..അത് അവസാനം റിസള്‍ട്ട്‌ വരുമ്പോഴേ അറിയൂ..(പിന്നെ റിസള്‍ട്ട്‌ വരാതെ എങ്ങനെ അറിയും) അരുണ്‍ പ്രിന്സിപലിന്റെ മൂത്ത മകളുടെകല്യാണത്തിന് പോയി സദ്യ ഉണ്ണുമ്പോള്‍ ഇളയ മകളുടെമുറചെറുക്കനുമായി കോര്‍ക്കുന്നു..പിന്നെ പറഞ്ഞു വെച്ച കല്യാണം മുടക്കുന്നു ..അതില്‍ കലിപ്പായി പ്രിന്‍സിപ്പല്‍ പരീക്ഷയില്‍ തോല്‍പ്പിക്കാന്‍ നോക്കുന്നു..ഇളയ മോള് കൊടുത്ത കീ കൊണ്ട് ചോദ്യ പേപ്പര്‍ അടിച്ചു മാറ്റിയ അരുണിനെ പ്രിന്‍സി പോക്കുന്നു..അപ്പോള്‍ മൂത്ത മകള്‍ പ്രസവ വേദന കൊണ്ട് പുളയുന്നു..പ്രിന്‍സിയുടെ വണ്ടി സ്റ്റാര്‍ട്ട്‌ ആകുന്നില്ല...ഹര്‍ത്താല്‍ പ്രമാണിച്ച് എല്ലാ ആംബുലന്സുകരും അടിച്ചു വീലായകൊണ്ട് അരുണ്‍ പ്രസവം എടുക്കുന്നു...പ്രിന്‍സി കലിപ്പ് മാറി അരുണിന് ഒന്നാം റാങ്ക് കൊടുക്കുന്നു..അതാണ് ക്ലൈമാക്സ്‌ ..പിന്നെ ബൈജു പള്ളിപുരത്തിന്റെ ഒരു കോമടി ട്രാക്ക്..വല്ല ഹോസ്റ്റല്‍ വാര്‍ഡാനോ കാന്റീന്‍ കാരനോ ആക്കാം.. ഈ കഥ എവിടെയോ കേട്ടിടുണ്ടല്ലോ ബൈജു.. all is well.. അതല്ലേ സാധനം.. ബിജു ബാബു ഒരു കള്ള ചിരി ചിരിച്ചു.

അല്ലേലും നമ്മുക്ക് ഇത് ശരിയാവില്ല ..രണ്ടു വലിയ പെണ്ണുങ്ങളുടെ അച്ഛന്‍ ആകാനുള്ള പ്രായം ഒന്നും എനിക്കായില്ലോ.(എവിടെ.. അപ്പൂപ്പന്‍ ആവാന്‍ ഉള്ള സമയം കഴിഞ്ഞു ).പിന്നെ എന്റെ ഫാന്‍സ്‌ ..അവര്‍ എന്ത് പറയും...എന്നാ പിന്നെ മറ്റേതു പറയാം അല്ലെ ബാബുബിജു കണ്ണ് കാണിച്ചു..
ഈ കഥ ഇന്നേ വരെ ആരും പറഞ്ഞിട്ടില്ലാത്ത കഥയ സതീശേട്ട..വളരെ ചലഞ്ചിംഗ് റോള്‍ ആരിക്കും..മലയാള സിനിമേലല്ല ലോക സിനിമേല്‍ ആദ്യമായിടരിക്കും ഒരു സൂപ്പര്‍ താരം കുക്ക് ആയിട്ടു അഭിനയിക്കുന്നേ..കഥയുടെ പേര് വേദനിക്കുന്ന കോടീശ്വരന്‍..


ഒരു അരിവെപ്പുകാരന്‍..അയാള്‍ ജോലിചെയ്യുന്ന ഹോട്ടലുടമയുടെ മകള്‍ സുനിതയുമായി പ്രേമത്തിലാണ്...എന്നാല്‍ ഹോട്ടലുടമക്ക് മകളെ ഒരു ഐടി എന്ജിനീയരെ കൊണ്ട്കേട്ടിക്കാനാണ് പരിപാടി....ഈ അരിവെപ്പുകാരന്‍ ഒരു പാട്ടുകാരന്‍ കൂടി ആണ്...ഹരിഹര പ്രിയ ചാനെല്‍ നടത്തുന്ന റിയാലിറ്റി ഷോയില്‍ അരിവെപ്പുകാരന് ഒരു ലക്ഷം രൂപയുടെ സമ്മാനം കിട്ടുന്നു...അയാള്‍ അതുകൊണ്ട് ഒരു വലിയ ഐടി കമ്പനി വാങ്ങുന്നു..( ഒരു ലക്ഷം രൂപ കൊണ്ട് ഒരു ചായക്കട പോലും കിട്ടില്ല എന്നീ പൊട്ടന്‍മ്മാര്‍ക്ക് അറിയില്ലേ )എന്നിട് അതിന്റെ എംഡി ആകുന്നു..അമേരികയില്‍ നിന്നും ഉള്ള ഒരു വലിയ കോണ്ട്രാക്റ്റ് ആ കമ്പനിക്കു കിട്ടുന്നു..അങ്ങനെ അരിവെപ്പുകാരന്‍ ഒരു കോടീശ്വരന്‍ ആകുന്നു.എന്നിട്ടും ഹോട്ടലുടമ ചൊവ്വ ദോഷത്തിന്റെ പേരും പറഞ്ഞു കല്യാണത്തിന് സമ്മതിക്കുന്നില്ല...ഇടയ്ക്കു അയാള്‍ പഴയ കാലം ഓര്‍ത്തു പണ്ട് അരി വച്ചിരുന്ന ഹോട്ടലിന്റെ മുന്‍പില്‍ ബെന്‍സ് കാറില്‍ പോയി അല്പം വേദനിക്കും..അയാളുടെ ജോലിക്കാരനാണ് ഹോട്ടലുടമയുടെ മകളെ കെട്ടുന്ന എന്‍ജിനീയര്‍..വിവാഹത്തിന്റെ അന്ന് എന്ജിനീയരെ പഴയ അരിവെപ്പുകാരന്‍ പിരിച്ചു വിടുന്നു...എങ്ങിനീയരുടെ കൂട്ടുകാരന്‍ അത് ഹോട്ടലുടമയെ മൊബൈലില്‍ വിളിച്ചു അറിയിക്കുന്നു..കല്യാണം നടക്കുന്നില്ല..സുനിത പന്തലില്‍ നിന്നും ഇറങ്ങി ഓടി..ഹോട്ടലുടമ കുഴഞ്ഞു വീണു..ആശുപത്രി ഡോക്ടര്‍മാര്‍..ഡോക്ടര്‍മാര്‍ ആശുപത്രി..അത് മാറി മാറി കാണിക്കും.അരി വെപ്പുകാരന്‍ എം ഡിയെ കെട്ടി സുനിത ആശുപത്രിയില്‍ എത്തി...ആശുപത്രിയില്‍ വെച്ച് ഹോട്ടലുടമ അവരുടെ കൈകള്‍ ഒന്നിച്ചു വെച്ച് കൊടുത്തിട്ട് മരിക്കുകയാണ്..മരിക്കുകയാണ്..രണ്ടോ മൂന്നോ പാട്ടിനു സ്കോപ് ഉണ്ട്....രണ്ടു ഫൈറ്റ് വരും..അങ്ങനെ മൊത്തത്തില്‍ ഒരു ഫെസ്റിവല്‍ മൂഡു ആരിക്കും..ബിജു ബാബു പറഞ്ഞു നിര്‍ത്തി..

മുതലാളിയുടെ മുഖം തെളിഞ്ഞു..ഇത് നമ്മള്‍ ചെയ്യുന്നു..

ഈ പടം എന്തായി തീരും എന്ന് എനിക്കറിയില്ല...കാരണം ബിജു ബാബുവിനെ തെറി പറഞ്ഞതിന് മുതലാളി അപ്പോള്‍ തന്നെ എന്നെ പിരിച്ചു വിട്ടു..

ഹോട്ടല്‍ സീക്കോ അവിടെ തന്നെ ഉണ്ട്....ഒരു പ്രോടുസര്‍ ബിരിയാണി വെച്ചാല്‍ നല്ല രുചി ആയിരിക്കുമോ ആവൊ.

Sep 2, 2010

വീണ്ടും ചില പേരൂര്‍ കാര്യങ്ങള്‍ ..


പെരൂരിന്റെ കഥകള്‍ ഒരിക്കലും പറഞ്ഞു തീരില്ല......ഇത്ര മാത്രം പറയാന്‍ എന്തിരിക്കുന്നു എന്ന ചോദ്യം ഉയര്‍ന്നേക്കാം എന്നാലും അത്രയധികം സംഭവങ്ങളും വളരെ പ്രതേക സ്വഭാവ രീതികളുമുള്ള ഒരുകൂട്ടം സാധാരണക്കാര്‍ വസിക്കുന്ന ഒരിടമാണ് എന്റെ ഗ്രാമം...പേരൂര്‍ .


ദൈവമേ നിന്‍ സ്നേഹമെത്ര മോഹനം...

നിന്‍ ഹൃദത്തില്‍ വഴുവോര്‍ ഭാഗ്യവാന്മാര്‍..

അപുര്‍വമയെങ്കിലും ഈ ഗാനം കേള്‍ക്കുമ്പോള്‍ ഞാന്‍ വളരെ വര്‍ഷങ്ങള്‍ക്കു പിന്നിലേക്ക്‌ പോകാറുണ്ട്...അന്നൊക്കെ മണല്പുറത്തു യകൊബായ കണ്‍വെന്‍ഷന്‍ നടക്കുന്നതിനു മുന്‍പ് ഈ പാട്ടു വെച്ചിരുന്നു.....ജാതിഭേദമേന്യേ കുട്ടികള്‍ അവിടെ വരുമായിരുന്നു... കണ്‍വെന്‍ഷന് മുന്പ് മണല്പുറത്തു കുറെ കളിക്കാം, പിന്നെ കൂട്ടുകാരോടൊപ്പം സമയം ചിലവിടാം എന്നതില്‍ കവിഞ്ഞു ഞങ്ങള്‍ അവിടെ നിത്യേന പ്രസംഗിക്കുന്ന താടി ഉള്ള സുന്ദരനായ അച്ചനെ ശ്രധിക്കുമായിരുന്നില്ല ..കുറച്ചു കൂടി വളര്ന്നപോള്‍ അച്ചന്‍ പറയുന്നത് കേള്‍ക്കാന്‍ താല്പര്യം തോന്നിയത്, ലളിതമായ വാക്കുകളില്‍ നര്‍മം കലര്‍ത്തി പറയുന്നത് കൊണ്ടായിരുന്നു എന്ന് തോന്നുന്നു.. അച്ചന്‍ പിന്നീട് ടുഷന്‍ പഠിപ്പിക്കാന്‍ എത്തിയപ്പോഴും വളര്‍ന്നു പെരൂരിന്റെ തന്നെ ബ്രാന്‍ഡ്‌ അംബാസടര്‍ എന്ന നിലയില്‍ എത്തിയപ്പോഴും കണ്‍വെന്‍ഷന് പ്രസംഗിക്കുന്ന അച്ചനെ ആയിരുന്നു നമുക്ക് എല്ലാവര്ക്കും ഇഷ്ടം.......

പാലം വരുന്നതിനു മുന്‍പ് കടത്തു കടന്നായിരുന്നു അക്കരെ തിരുവഞ്ചൂരില്‍ പോകേണ്ടിയിരുന്നത്‌...രാത്രി അവസാനത്തെ വള്ളം എട്ടുമണിക്ക് ആയിരുന്നു...തിരുവഞ്ചൂര്‍ അമ്പലത്തില്‍ ഉത്സവം കാണാന്‍ പോകുമ്പോള്‍ എട്ടുമണിക്ക് അവസാനത്തെ വള്ളം കടക്കും...പതുക്കെ നടന്നു തിരുവഞ്ചൂരില്‍ എത്തുമ്പോള്‍ ഒന്പതെങ്കിലും ആയിരിക്കും..പോകുമ്പോള്‍ കണ്ടു വെക്കുന്ന മാങ്ങാ, പേരക്ക, ചാമ്പങ്ങ ഇതൊക്കെ തിരിച്ചു വരുമ്പോള്‍ ആരും കാണാതെ ശാപ്പിടും..മേമ്പോടിക്ക് ഉപ്പു എതെകിലും കടയുടെ പുറത്തു വെച്ചിരിക്കുന്ന ഉപ്പും പെട്ടി തുറന്നു എടുക്കും..അങ്ങനെ ഒരിക്കല്‍ നടുന്നുപോകുംവഴി കണ്ടു വെച്ച മാങ്ങാ തിരിച്ചു വരുമ്പോല്‍ പറിക്കാം എന്ന് പ്ലാന്‍ ഇട്ടതും നമ്മുടെ സംസാരം കേട്ട് മാവിന്റെ ഇടയില്‍ നിന്നും " അതിനല്ലേ ഞാന്‍ ഇങ്ങനെ ഉറക്കമിളച്ചു ഇവിടെ തന്നെ ഇരിക്കുന്നെ " എന്ന വീട്ടുടമയുടെ അശരീരി കേട്ട് ഓടിയതും...ഇപ്പോള്‍ ഓര്‍ക്കുമ്പോള്‍ ഒരു ചെറു ചിരി അറിയാതെയെങ്കിലും വിടരുന്നു..


ഓര്‍മയില്‍അത്തറിന്റെ സുഗന്ധം ഇപ്പോഴും ഉണ്ട്....അസാമാന്യമം വിധം വെളുത് സുന്ദരികളായ രണ്ടു ചേച്ചിമാര്‍....സ്കൂളില്‍ പോവാന്‍ ബസ്‌ കാത്തു കവലയില്‍ നില്‍ക്കുമ്പോള്‍ അകലെ നിന്നെ അത്തറിന്റെ മണം വരുമായിരുന്നു..കടവില്‍ നിന്നും തിരുവഞ്ചൂര്‍ പോകുന്ന വഴി ആയിരുന്നു അവരുടെ വീട്....അന്നു അവര്‍ പേര്‍ഷ്യയില്‍ ആയിരുന്നു എന്നാണ് പറഞ്ഞു കേട്ടിരുന്നത്..


തമ്മില്‍വഴക്കുണ്ടാക്കിയ സഹോദരങ്ങള്‍ വഴിയില്‍ നിന്ന് പരസ്യമായി തെറി വിളിച്ചതും പരസ്പരം അപ്പന് വിളിച്ചതും പേരൂരില്‍ മാത്രം കാണാന്‍ പറ്റിയ ഒരു തമാശ ആവാം!പിന്നെ കടവില്‍ നിന്നും വള്ളമിറങ്ങി എല്ലാ വൈകുന്നേരങ്ങളിലും കോട്ടയത്തിനു പോകാനായി ബസ് കാത്തു നിന്നിരുന്ന പൂ ഒക്കെ ചൂടിയ കറുത്ത നിറമുള്ള സ്ത്രീ....അര്‍ഥം വെച്ച നോട്ടങ്ങളിലും സംസാരങ്ങളിലും പതറാതെ നിനക്കൊന്നും വേറെ പണിയില്ലേ എന്ന് പൊട്ടിത്തെറിച്ചിരുന്ന അവര്‍...


പേരൂര്‍ കാവിലേല്‍ മീന ഭരണി ആയിരുന്നു ഞങ്ങള്‍ കുട്ടികള്‍ കൂടിയിരുന്ന മറ്റൊരു ആഘോഷം..ഭക്തി അതിന്റെ പാരമ്യത്തില്‍ എത്തി നില്‍ക്കുമ്പോള്‍ ശൂലം കുത്തുന്നവര്‍...പിറ്റേന്ന് മുറിപാടില്‍ മഞ്ഞള്‍ മാത്രം തേച്ചു മുറിവ് കരിക്കുന്നവര്‍...കുംഭകുടതിനിടക്ക് നടന്ന ഒരു ചെറിയ കശപിശയില്‍ ഒരാളുടെ കൈ തല്ലിയൊടിച്ച സംഭവം ഭീതി നിറഞ്ഞ ഒരു ഓര്മ ആയി മനസ്സില്‍ ഉണ്ട്...അത് പിന്നീട് കാരിരുമ്പിന്റെ കരുത്തുണ്ടായിരുന്ന ഒരാളുടെ മരണത്തില്‍ എത്തി..മീശ പിരിച്ചു കൈലി മുണ്ട് പൊക്കി ഉടുത്തു നടന്നിരുന്ന ആ കരുത്തനെ കച്ചി ചുമന്നു നടന്നുപോകുമ്പോള്‍ പിന്നില്‍ നിന്ന് കാലില്‍ വെട്ടി വീഴ്ത്താന്‍ മാത്രമേ അവര്‍ക്ക് സാധിക്കുമ യിരുന്നുള്ള്.


പണ്ട് വെള്ളപ്പോക്കതിനൊക്കെ അടുത്തുള്ള ഗ്രാമത്തില്‍ നിന്ന് വരെ ആള്‍ക്കാര്‍ കൊച്ചു വള്ളങ്ങളില്‍ എത്തി പൂവതുംമൂട് ഷാപ്പില്‍ നിന്നും കള്ളും കപ്പയും ഒക്കെ വാങ്ങുമായിരുന്നു....ഷാപ്പിലെ കറിക്ക് ഒരു പ്രതേക രുചി ഇല്ലേ ? കുടിയന്മാര്‍ക് മാത്രമല്ല അവ പഥ്യം.ഷാപ്പില്‍ വൃത്തി കുറവാണു എന്ന് നിങ്ങള്‍ പറഞ്ഞേക്കാം....എന്നാല്‍ അവിടുത്തെ രുചി ഉള്ള ഭക്ഷണം അതെല്ലാം മറക്കാന്‍ നിങ്ങന്ലെ പ്രേരിപ്പിക്കുന്നില്ലേ?.വളരെക്കാലം മുന്‍പ് ഞാന്‍ കേട്ട ഒരു കഥയുണ്ട്...എന്‍റെ നാട്ടിലെ ഒരു ചെറിയ ചട്ടമ്പി.....ഷാപ്പില്‍ കേറി പന്ത്രണ്ടു പ്ലേറ്റ് കപ്പ കഴിച്ചു എന്നും പതിമൂന്നാമത്തെ ചോദിച്ചിട്ട് കൊടുക്കഞ്ഞിട്ടു കറി ക്കാരന്റെ തല അടിച്ചു പൊട്ടിച്ചുഎന്നും!കാശുഇല്ലഞ്ഞിട്ടാണോ.....കപ്പകൊടുക്കാന്‍ പറ്റാഞ്ഞിട്ടാണ...ആര്‍ക്കറിയാം.....ഷാപ്പ്‌ അവിടെ ഉണ്ടായിരുന്നപോള്‍ കവലയില്‍ ആളനക്കം ഉണ്ടായിരുന്നു എന്നത് നേര്.....ഇപ്പോള്‍ രാത്രി ഏഴു മണി ആയാല്‍ പിന്നെ കനത്ത നിശബ്ധത .പൂവതുംമൂട് ഷാപ്പ് ഇന്നൊരു ഓര്‍മയായി മാറിയിരിക്കുന്നു......അത് ഇപ്പോള്‍ കിണ്ടിക്കുഴി ഷാപ് ആയി മറ്റൊരിടത്തേക്ക് മാറ്റപ്പെട്ടു..


പേരൂര്‍ ഷാപ്പിലെ ഒരു പഴയ പാട്ടു കൂടി കേള്‍ക്കു...


കള്ളു ഷാപ്പിലിരിക്കും കള്ളു കോപ്പ നമോസ്തുതേ...
കള്ളളര്‍ന്നു കൊടുക്കും കൊച്ചു കാലു നമോസ്തുതേ..


സാധാരണക്കാരുമായ നിഷ്കളങ്കരായ ഗ്രാമീണരാണ് ഇവിടെ ഉണ്ടായിരുന്നത..ഇപ്പോഴും അവരില്‍ ഭൂരിഭാഗവും ഉണ്ടെങ്കിലും പെരൂരിനെയും പുതു തലമുറയുടെ ശീലങ്ങള്‍ ബാധിച്ചിരിക്കുന്നു എന്ന് പറയാതെ വയ്യ...പണ്ട് എല്ലാവര്ക്കും എല്ലാവരെയും പരസ്പരം അറിയുമായിരുന്നു...ഇന്ന് അല്പം അകലം ഉണ്ടായിട്ടില്ലേ എന്നൊരു സന്ദേഹം...കുര്‍ബാന കഴിഞ്ഞെത്തുന്നവരെ കാണാന്‍ പണ്ട് കലുങ്ങില്‍ കാത്തിരിക്കുന്നവരെ പോലെ ആരെങ്കിലും ഇന്ന് ഉണ്ടാവുമോ ? കടത്തു വള്ളം ഇറങ്ങി വന്നിരുന്ന നാടന്‍ സുന്ദരിമാര്‍ ഇന്ന് പാലം ഇറങ്ങി ഹോണ്ട ആക്ടിവയില്‍ ചീറി പാഞ്ഞു പോകുന്നു... നിര്‍ത്താതെ പോകുന്ന ബസ്‌ തടയുന്ന നാട്ടുകാര്‍ ഇന്നില്ല...നാട്ടിലെ പണക്കാരനായ കോണ്‍ട്രക്ടര്‍ കാറില്‍ പോകുന്നത് ആരാധനയോടെ നോക്കി നിന്നിരുന്നവര്‍ ഇനി ഉണ്ടാവില്ല..കാരണം പേരൂരില്‍ വാഹനങ്ങള്‍ പെരുകിയിരിക്കുന്നു..


പേരൂര്‍ കഥകള്‍ ഇനിയും തുടരും...ഒരുപാടു ഓര്‍മ്മകള്‍ ..ഒരുപാടു സാധാരണ മനുഷ്യരുടെ കഥകള്‍...